PRESSEMELDING 14.3.2016
Publikum stemte fram Kampen om fjordane som sin favorittfilm på årets festival. Vigdis Nielsens dokumentar om Synnøve Kvamme (22) som er villig til å gå i fengsel for å redde fjella og naturen i heimbygda, skapte stort engasjement og begeistring under festivalen i Oslo denne helga.
-Eg er utruleg glad og stolt over at publikumtok så godt i mot filmen, seier regissør Vigdis Nielsen. –Å vinne denne prisen i konkurranse med så mange sterke og gode dokumentarfilmar betyr svært mykje for meg som filmskapar.
Eurodok hadde i år 11 europeiske og 12 norske dokumentarfilmar på programmet, filmar som representerer noko av det beste innan ny europeisk dokumentarfilm. Festivalen som i år blei arrangert for 15. gong, sette ny publikumsrekord med 3.160 besøkande i løpet av hektiske festivaldagar på Filmens Hus.
Kampen om fjordane er ein dokumentarfilm om kjærleik til naturen der Synnøve Kvamme saman med andre modige naturvernforkjemparar sloss mot Staten og energiselskapa for å redde fjella og naturen. Ho vil ikkje ha “monstermaster” gjennom det vakre fjordlandskapet i Hardanger. Trassig kjempar ho mot regjeringas vedtak og Statnett sine planar. Bygdefolket blir møtt med truslar om namsmann og ekspropriasjon. Dette er Davids kamp mot Goliat. Ikkje sidan protestane mot utbygging av Altaelva har eit naturinngrep blitt møtt med så sterke reaksjonar. Det som starta som ein kamp for urørt natur utviklar seg til å bli ein kamp for sjølve demokratiet.
-Me håpar at denne prisen kan medverka til å få filmen ut til eit større publikum, seier produsent Geir Netland. -Det er allereie interesse for filmen frå heile landet og me er i dialog med naturvernorganisasjonar som seier at filmen diverre er altfor aktuell. Kampen i Hardanger har mange likskapstrekk med nye naturvernsaker og konfliktar.
Kontakt:
Geir Netland, produsent; tlf. 900 38 286, geir.netland@hardingfilm.no
Vigdis Nielsen, regissør; 902 01 588, vigdis.nielsen@hardingfilm.no
Pressefoto kan lastas ned frå http://hardingfilm.no/press
Eurodok: http://eurodok.no
Hardingfilm: http://hardingfilm.no